Rak_roots

Namoy Andrarezina ny tontolon'ny mozika malagasy, nodimandry ny 20 Jolay 2022 tao Mahajanga ny mpanakanto RAK ROOTS na Rakotonirina Loïc, rehefa nivahiny 30 taona teto an-tany.

Niainga tany Mahajanga ny Alakamisy 21 Jolay 2022 tamin'ny 2ora tolakandro ny razana ary tonga teny Ivato Antananarivo tamin'ny 3ora, Nandrasana tao amin'ny Lapan'ny Kolontsaina sy ny Fanatanjahantena Mahamasina ny razana ary nanao tsy omby aloha ny mpanakanto sy ny mpakafy nanao veloma farany azy teny an-toerana.
Tonga nitondra ny teny fampiononana sy nankahery ny fianakavian'i Loïc RAKOTONIRINA na i RAK ROOTS ny Filohan’ny Repoblika Andry RAJOELINA niaraka tamin'ireo Filohan'ny Antenimiera roa tonta sy ireo mpiara-miasa ao anivon'ny Fiadidiana ny Repoblika, ny 21 Jolay 2022.
Ny 22 Jolay dia nihazo avy hatrany an'Antsirabe ny razana. Natao veloma farany tao amin'ny Fiangonana Loterana Malagazy Atsirabe Antampontanàna ny Alahady 24 Jolay 2022. Tonga nanotrona sy nankahery ny fianakaviana tamin'izany ny Fitondram-panjakana, ny departemanta ministerialy, Ny mpitantana ny Fiangonana Loterana, ny orinasa tsy miankina, ny mpiara-mivavaka, ny Fivondronan'ny mpanankanto ao Antsirabe, ny mpanakanto rehetra na avy ao Antsirabe na avy ao andrenivohitra, ny mpankafy ary ny vahoakan'Antsirabe. Tamin'ny 10 ora maraina no ninga nihazo an'Antananarivo ny tranovorona mitondra an'i RAK ROOTS. Ny nofo mangatsiakany dia napetraka tao Ambatobe Tsiafahy Atsimondrano, misy ny fasan-drazany ny 24 Jolay 2022

Nodimandry teo amin'ny faha-30 taonany, tao Mahajanga, ny Alarobia 20 Jolay 2022 ny mpanakanto RAK'ROOTS na Rakotonirina Loïc.
Naneho ny fiaraha-miory ny Governoran'Analamanga Hery Rasoamaromaka :

"Ny tenako sy ireo mpiara-miasa rehetra ato amin'ny Faritra Analamanga dia maneho ny fiaraha-miory sy mankahery ny fianakavian'i Loïc Rakotonirina na i RAK'ROOTS noho izao fahalasanany tampoka tany Mahajanga izao. Rak'Roots dia namana sady efa mpiara-miasa taminay tato amin'ny Faritra Analamanga matetika. Mandria am-piadanana Rak'Roots."