Vita tanteraka ankehitriny ny fanarenana an'Analamanga Park. Misokatra ho an'ny daholobe indray ity toeram-pitsangatsanganana sy fialam-boly tantanin'ny Faritra Analamanga ity manomboka izao. Nitokana sy nisantatra izany ny Filohan'ny Repoblika Andry RAJOELINA ny 16 Oktobra 2021, tao anatin'ny lanonana manetriketrika nokarakarain'ny Faritra Analamanga tarihin'ny Governora Hery RASOAMAROMAKA....
Vory lanona teto Ampangabe ireo manam-pahefana sy olo-manankaja maro eto amin'ny firenena nahitana ny Filohan'ny Antenimieran-doholona sy ny Filohan'ny Antenimieram-pirenena, Solombavambahoaka, ny minisitry ny Atitany sy ny Fitsinjaram-pahefana, ny Préfet de Police Antananarivo, Governora avy any amin'ny Faritra, ary ireo ben'ny tanàna marobe.
Fotoam-pivavahana notarihin'ny FFKM no nanombohana ny fotoana, ho fisaorana an'Andriamanitra amin'ireo zava-bita sy ho fangataham-pitahiana amin'ireo asa mbola hotanterahina. Tamin'izany no namelabelarana izay voasoratra ao amin'ny bokin'ny Ohabolana 16:3 "Ankino amin'ny Tompo ny asanao, dia ho lavorary izay kasainao".
Efa nandrasan'ny mponina hatry ny ela izao fisokafan'Analamanga Park izao hoy ny Ben'ny tanàna ao amin'ny Kaominina Ambalavao satria ny fisian'ity toerana ity dia isan'ny mampidi-bola ho an'ny kaominina sy ireo tantsaha na mpanao asatanana ao antoerana.Nitondra ny hetahetan'ireo ben'ny tanàna maro manerana ny nosy moa ny ben'ny tanànan'Ambalavao ny mba hampitomboana ny fanampiana ara-bola ho an'ny kaominina.
Naneho ny hafaliany kosa ny Governoran'Analamanga Hery RASOAMAROMAKA noho ny fahavitan'izao asa fanarenana goavana izao satria nody ventiny tokoa ny rano nantsakaina. Tsy mbola nisy fitondrana nahavita fotodrafitrasa betsaka toy izay vitan'ity fitondrana ity teto Madagasikara, hoy hatrany ny Governora ka niantso ny Filoha izy mba hirotsaka hofidiana indray amin'ny taona 2023 ho fanohizana ny fampandrosoana.
Ny Solombavambahoakan'i Madagasikara voafidy tao Atsimondrano, Andry RATSIVAHINY kosa no nanambara fa tsy menatra ny tenany sy ny vahoakan'Atsimondrano mijoro sy manohana ny Filohan'ny Repoblika satria tsy takona afenina ny fampandrosoana ataon'ity fitondrana ity na dia eo aza ny fanaratsiana ataon'ny mpanohitra.
Ny fanaratsiana tsy mahasakana antsika hanasoa ny vahoaka, hoy kosa ny Filoha Andry RAJOELINA raha nandray fitenenana. Ny asa rehetra atao dia natao hanasoavana ny vahoaka araka ny velirano efa napetraka ka hentitra ny teniny tamin'ireo tompon'andraikitra samihafa eto amin'ny Firenena amin'ny fanatanterahana izany. Ea misy ny tombana atao amin'ireo Governoram-paritra amin'ny asa vitan'izy ireo tsirairay avy ka hosoloina avy hatrany raha misy tsy nahatanteraka ny asa tokony ho nataony. Hampitomboina ny fanampiana ny kaominina na ny subvention mba ahafahan'ny kaominina isanisany miasa araka ny tokony ho izy. Mikasika ny kaominina Ambalavao manokana dia homena lycée manara-penitra vaovao mba hanalana ny fahasahiranan'ireo mpianatra sy ny raiamandreny.
Nanafana ny lanonana ny tarika TGC tamin'ireo hira Gospel mampalaza azy. Toy izany koa ny tarika Ry Kala Vazo tamin'ny fahaizany mitendry zavamaneno sy ny fampiaraham-peo kanto dia kanto. Nanakoako teto Ampangabe ny HAODY RY ANALAMANGA noredonin'ny tarika SOLIKA izay marihina fa ity hira ity dia natolotry ny fianakaviana Jean Ratsaramiafara ho hira fanevan'ny Faritra Analamanga.
Taorian'ny kabary nifandimbiasana dia niroso tamin'ny fitsidihana ireo fotodrafitrasa isan-karazany misy eto Analamanga Park ireo manam-pahefana sy ny vahiny rehetra nasaina. Samy nitolagaga ny rehetra nahita ny hakanton'ny toerana sy ny zava-misy ao aminy toy ny efitrano fandraisam-bahiny "bungalows", ny coliseum fanaovana fampisehoana, ny efitrano fandraisana fivoriana, ireo dobo filomanosana, ireo kianja fanaovana fanatanjahan-tena (basket, pétanque, terrain synthétique football), toeram-pilalaovana ho an'ny ankizy...